Nau mai, haere mai.
Kei konei koe ki te tirotiro i tētahi,
tērā pea whānau, hoa rānei, i te mea i pā he māuiui, he wharanga nui rānei,
ā, me whiwhi tiakanga motuhake.
Koinei te wāhi tika mōna. E mōhio ana mātou he kōhuki te
haere ki te tirotiro mō te whānau.
Kei te hiahia mātou ki te whakaatu haere i ngā wāhi
kia rite koe mō tō toronga ki konei.
Ahakoa kei hea koe i Aotearoa
kei konei te tira ki te tautoko i a koe.
Kia tae koe ki te whare, ka kite koe i tētahi wheowheo,
he pūwhiti reo, me kōrero rānei ki tētahi kiripaepae i mua o te kuhunga.
I tō toronga tuatahi, ka whakaaturia te wāhi
tatari ā-whānau me ngā whare e wātea ana.
Ka tiakina tō whānau e te tira.
Ka wawe te kawe i a koe ki te tiro i a rātou.
Ka tukuna hoki he kōrero ki a koe mō te āhua o te whakapā mai, ngā tūnga waka, me ngā kōwhiringa o te noho pō.
Tirohia ngā haora toronga, i te mea he rerekē i ētahi atu wāhi o te hōhipera.
Ina toro mai koe, ko te mea tuatahi ka kite koe, e pokea ana ngā kaimahi e te mahi, ā, he nui ngā taputapu.
He tira nui o ngā nēhi, ngā tākuta me ētahi atu mātanga e tiaki ana i te tangata e arohatia ana e koe.
Mā rātou e whakamārama ko wai rātou, ā, me te āhua o ngā āwhina.
Engari me pātai mēnā he mea kāore nei koe i te tino mārama.
Me titiro tātou ki ētahi o ngā taputapu ka kitea e koe.
Ka whakaatu te mata i te taha o te moenga i ngā tohu waiwai pēnei i te pēhanga toto, te hoto manawa, te hēhē me ngā taumata hāora.
Ka whakamahia pea ngā momo maruhā me ngā pūrere rerekē, ki te tuku i te hāora me te tautoko i te hēhē.
Ka werohia he ngongo ki te āwhina ki te aroturuki i te pēhanga toto, te tango tīpakohanga toto, me te whakamahi papu, hei tuku wē me ngā rongoā kaha.
Ki te uaua te kai, te horomi rānei, ka kōkuhua pea he ngongo kai.
Ka hiahia pea he pū tōngāmimi hei whakawātea i te pukumimi.
He hoihoi tonu te āhua o te wāhi moe.
Mēnā he panoni anō, ka tangi te matohi o te pūrere ki te whakamōhio ake i te tira.
Ehara i te mea he take ohotata tēnei i ngā wā katoa.
Engari he mea hirahira kia mōhio mēnā ka panoni ētahi mea.
He mea hirahira rawa hoki te tiaki i ngā tūroro kia pai te noho.
Ko tā te nēhi mahi he horoi i a ia, te tiaki i te waha me ngā kanohi, me te āwhina pea ki te whakawātea i ngā pipīnga o te uma.
Ka āwhina ngā tahuritanga auau o te tinana ki te karo i ngā wharanga pēhanga, i ngā pokenga rānei.
Ka taea pea e koe te āwhina ki ētahi o ēnei mahi.
Me kōrero ki te nēhi taha moenga mēnā koinei tēnei mahi e hiahia ana koe ki te mahi.
Engari ki te kore, tērā ētahi atu āwhinatanga māu hei āwhina ki te tautoko i te tangata e tirohia ana e koe.
Ahakoa kāore anō kia oho, me whakamōhio i tō tatanga.
Puritia tōna ringa, ka kōrero atu, ka karakia, ka waiata rānei.
Whakatangihia ngā puoro e pai ana ki a ia.
Haria mai he taonga.
He mea ngāwari noa engari he āwhina ka taea e koe.
He mea hirahira rawa kia mārama koe ki ngā āhuatanga hou o ngā whakanekeneke.
He maha ngā huarahi e tutuki ai tēnei, mai i ngā huringa wāri, ki ngā hui ā-whānau, te wāhi e tūtaki ai koe ki te tira haumanu ki te whiu pātai, te whiti mōhiohio me te rapu he aha ngā whakanekeneke.
Me kōrero ki te nēhi taha moenga mō te āhua o tēnei i tō wāhi noho, ā, ki te hiahia, tēnā pātai atu ki te tākuta.
Kei tūpono pōkia koe e te taumaha i taua wā.
Me tuhi he pātai me te kōrero o ngā mea kua whākina, i te wā o ngā hui, otirā ka āwhina kia mau tō aronga.
Mā te tohu i tētahi mema o tō whānau hei whakamōhio haere i te whānau whānui hei whakangāwari i te taumahatanga.
Me kōrero ki te tira mēnā e āhei ana te toro atu me ngā tamariki, me te whai tohutohu o te kōrero i
te take nei ki te hunga taiohi.
Ki te pāpōuri koe ki te āhua o te tiakanga,tēnā whakamōhiotia ngā kaimahi, kia pai ai tā rātou āwhina.
Ki te kore e kitea he ara whakamua tēnā whakapā atu ki te ratonga o Ngā Kaitautoko
mō ētahi atu tohutohu me te tautoko.
He mahi nui te toro ki te hōhipera. He kōhuki, ā, he pāpōuri pea te kite i tētahi me te mate hārukiruki, e tautokotia ana hoki e ngā taputapu hauora.
Ka māharahara pea koe ki ngā āhuatanga ka pā i muri ake. He pātahi noa ngā urupare te whētuki, auhī me te whānuitanga noa o ngā urupare ka ara ake.
He pai hoki te noho pai noa. Me kaha te tiaki i a koe anō mā te māwehe ake i te taha moenga ki te whakatā, te kai, kia pūhia e te hau.
Mēnā ka taea, me tohatoha ngā wā toronga ki ētahi atu, ā, me whakapono ki te tira ka whakapā atu rātou ki a koe ki te pā he rerekētanga, he take āwangawanga rānei.
Ki te taumahatia koe, he āwhinatanga pea te kōrero ki tētahi atu.
Ka wātea pea he kaitauwhiro, he kaumātua, he kaitautoko taha wairua rānei ki a koe.
Tirohia ko wai ngā kaimahi Hauora Māori me ngā Ratonga Hauora Pasifika e wātea ana i te Hōhipera.
Kōrero ki te nēhi taha moenga i ō whakaaro ā, māna koe e āwhina ki te huarahi whakamua.
Ko tā mātou hiahia kia rongo koe i te tautoko i a koe i konei, nā reira toro mai mēnā he pātai āu.
Nō reira, tēnā koutou, tēnā koutou, tēnā koutou, tātou katoa.